શું તમે પરણેલા છો ?
શું તમે વર્લ્ડ કપ જોવા માંગો છો ?
શું ઘરમાં ટીવી પર તમારો કબજો નથી ?
તો વર્લ્ડ કપ જોવા માટેનાં કેટલાંક અધીર અમદાવાદી બ્રાંડ ઉપાયો.
- સહેલામાં સહેલો રસ્તો છે કે બીજું ટીવી વસાવી લો. એ ન પોસાય તો આગળ વાંચો.
- જો તમારે બાળક હોય તો એને મેચમાં જોવા તૈયાર કરો. તમને એ ના પાડશે પણ બાળકને ના નહિ પાડી શકે.
- જો એને સંગીતનો શોખ હોય તો એને આઈ પોડ લાવી આપો અને એનાં મનગમતા ગીત શોધીને એમાં લોડ કરી આપો. મેચ વખતે એ કચકચ નહિ કરે.
- જો એને વાંચવાનો શોખ હોય તો એનાં મનગમતા લેખકની વાર્તાની ચોપડીઓ લઇ આવો.
- ઘરમાં ગાર્ડનિંગના ટુલ લઇ આવો. એને કહો કે તારા પપ્પાના ત્યાં બહુ સરસ બગીચો છે. શું આપણો બગીચો એવો ન બને ? એ તમને કામમાં જોતારવાના પેંતરા કરે તો એથી બચવાના બહાના માટે આ લખનારની ટીપ્સ એસ.એમ.એસ. દ્વારા મેળવો. (સબસ્ક્રિપ્શન ચાર્જીસ એપ્લાય)
- વર્લ્ડ કપના સમય ગાળા દરમિયાન શ્રીમતીજી ને પિયર જવા પ્રોત્સાહન આપો. કહો : બકા, બહુ સમયથી તું પિયર ગઈ જ નથી નહિ ? છેલ્લે ફોન આવ્યો ત્યારે મમ્મી પણ તને બહુ યાદ કરતી હતી.
- વર્લ્ડ કપ ચાલતો હોય ત્યારે પત્નીને કોઈ કુકિંગ, સ્વીમીંગ, જીમ, ડાન્સ, ક્રાફ્ટ એવા કોઈ ક્લાસ જોઈન કરાવી દો. બે ક્લાસ બેક-ટુ-બેક હોય તો બેસ્ટ. જરુરુ પડે તો એને સ્કુલ-કોલેજ દરમિયાન શું હોબી હતો એ તપાસ કરો અને એને અનુરૂપ એક્ટીવીટી શોધી કાઢો.
- કોઈ ઇવેન્ટ મેનેજમેન્ટ કંપનીને રોકી સમદુખિયાઓ ભેગા થઇ પત્નીઓ માટેની કીટી પાર્ટીનું આયોજન કરો. આ કંપનીઓ કરાર મુજબ તમારા ઘેર ફોન કરીને તમારી પત્નીને ઇનામમાં પાર્ટીનું આમંત્રણ આપશે. કહેવાની જરૂર નથી કે આવી પાર્ટીઓ વર્લ્ડ કપની મેચ સમયે જ ગોઠવાશે.
- ઘરમાં ધોની અને બ્રેટ લીના પોસ્ટર લગાવો. ફાંદધારી પતિ કરતાં ક્રિકેટરો જોવા એ લોકો વધારે પસંદ કરશે. (મારી સામે આંખો ના કાઢો. તમારો જે પેટનો વિસ્તાર છે એને ગુજરાતીમાં ફાંદ જ કહેવાય.) પણ આમ કરતાં પણ એ તમને મેચ જોવા દેશે. અને ધોની કે લી સુધી એ પહોંચી શકવાની નથી, એટલે ખોટી ચિંતા કરવી નહિ.
- અને છેલ્લો ઉપાય. રીમોટ હાથમાં લો. પગ પર પગ ચઢાવીને બેસો. અને બોલો : ‘હું બધ્ધી મેચ જોવાનો છું, જા થાય એ ભડાકા કરી લે !’
હેપ્પી વર્લ્ડ કપ વ્યુંઈંગ......
